«Nur Otan» partıasynyń Saıası menedjment mektebi praımerızge qatysýshylarǵa arnalǵan «Praımerız. Jarıa saıasat. Depýtattyń beınesi qandaı bolýy kerek?» dep atalatyn oqý baǵdarlamasynyń bastalatyny týraly aqparat taratty, dep habarlaıdy Qamshy.kz partıanyń Facebook jelisindegi resmı paraqshasyna silteme jasap.

"Qurmetti dostar! Ózderińiz biletindeı, aǵymdaǵy jylǵy 17 tamyz ben 3 qazan aralyǵynda «Nur Otan» partıasynyń praımerızi ótedi. Onyń basty maqsaty – aldaǵy Májilis pen barlyq deńgeıdegi máslıhattarda partıalyq tizimderdi qalyptastyrý úshin básekeles kúres negizinde jańa kóshbasshylardy anyqtaý. Jańa formattaǵy partıaishilik irikteý partıanyń árbir múshesiniń qatysýyna múmkindik beredi.

Osyǵan oraı «Nur Otan» partıasynyń Saıası menedjment mektebi praımerızge qatysýshylarǵa arnalǵan «Praımerız. Jarıa saıasat. Depýtattyń beınesi qandaı bolýy kerek?» dep atalatyn oqý baǵdarlamasynyń bastalatyny týraly habarlaıdy.

Eger praımerız jaıly, zamanaýı aqparattyq bolmys jaǵdaıynda jeke ımıjińizdi basqarýdyń negizgi prınsıpteri, saıası qarym-qatynas pen sheshen sóıleý daǵdylary týraly jan-jaqty bilgińiz kelse, Sizderdi osy oqý baǵdarlamasyna qatysýǵa shaqyramyz.

Semınarlarda belgili saıasattanýshylar, memlekettik jáne qoǵamdyq qaıratkerler, psıhologtar spıker retinde sóz sóıleıdi. Olardyń ishinde Ermuhamet Ertisbaev, Aıdos Sarym, Rasýl Jumaly, Andreı Chebotarev, Saıasat Nurbek jáne basqalar bar.

Oqytý baǵdarlamasy onlaın rejımde ótetin tórt modýlden turady.

Birinshi modýl: Partıaishilik irikteý-praımerızin iske asyrý mehanızmi.
Ekinshi modýl: Praımerızdi ótkizýdiń halyqaralyq tájirıbesi. Depýtattyń bıliktegi róli men orny.
Úshinshi modýl: Depýtattyń beınesi. Imıj jáne minez-qulyqtyń tıimdi úlgisin qalyptastyrý.
Tórtinshi modýl: Saıası sheshendik.

Interaktıvti pikirtalas, toptarda praktıkalyq sabaqtar jáne shyǵarmashylyq tapsyrmalar qarastyrylǵan. Qatysýǵa nıet bildirgen barlyq partıalyqtar úshin sabaqtar tegin ótkiziledi.
Semınarlar osy jyldyń 15 maýsymynda bastalyp, 7 tamyzda aıaqtalady jáne saǵat 9.30 – 13.00 aralyǵynda ótedi.

Tolyǵyraq aqparatty turǵylyqty mekenjaıyńyz boıynsha partıanyń oblystyq fılıalynan nemese «Nur Otan» partıasynyń Saıası menedjment mektebinen myna mekenjaı boıynsha alýyńyzǵa bolady:
Nur-Sultan q., Qonaev kóshesi, 12/1
tel. +7-7172-707621
www.spm.nurotan.kz saıty,
info_school@spm.nurotan.kz elektrondy poshtasy
Áleýmettik jelilerdegi akkaýnttar:
www.instagram.com/spm.nurotan.kz" delingen partıanyń resmı paraqshasyndaǵy jazbada.